સદ્દભાવના મિશનની પુર્ણાહુતી તથા તિથી ભોજન

તા-૨૪ થી ૩૦ સુધી રાબેતા મુજબ નક્કી કરેલા નાના મોટા અન્ય કાર્યક્રમો તેમજ પ્રભાતફેરીનું આયોજન કરેલું હતું. આ દરમ્યાન પ્રભાતફેરીમાં વાલીઓનો પણ સારો એવો સાથસહકાર મળ્યો હતો.

છેલ્લે દિવસે શાળાના વિધાર્થી વિશાલ રામસિંહ પરમારના વાલી શ્રી રામસિંહ ઉદેસિંહ પરમાર તરફથી તિથી ભોજનનું આયોજન કરવામાં આવ્યું હતું. વિધાર્થીઓ શાંતિથી તિથીભોજન કરી શાળાએ પરત ફર્યા.
            ત્યારબાદ શાળાના આચાર્યસાહેબશ્રીએ સદભાવના કાર્યક્રમ અંતર્ગત વક્તવ્ય આપ્યું. તેમજ તા ૩૧ ના રોજ આણંદ ખાતે રાખેલ સદભાવના મિશનમાં પધારનાર મુખ્યમંત્રી શ્રી નરેન્દ્રભાઈ મોદીને મળવા માટે બાળકો તેમજ તેમના વાલીઓને માહિતી આપી અને જરૂરી માર્ગદર્શન આપવા બાહેધરી આપી. શાળાના શિક્ષકશ્રીએ આજ રોજ સદભાવના કાર્યક્રમની પુર્ણાહુતી જાહેર કરી તેમજ કાર્યક્રમમાં ભાગ લેવા બદલ શાળાના વિદ્યાર્થીઓ તેમજ શિક્ષકોનો અને વાલીઓનો આભાર વ્યક્ત કર્યો.
            

સદભાવના મિશન અંતર્ગત અમારી શાળામાં સરકારશ્રીના આદેશ મુજબ તા- ૨૦/૧/૨૦૧૨ થી તા-૩૦/૧/૨૦૧૨ સુધી વિવિધ કાર્યક્રમોનું આયોજન કરવામાં આવ્યું હતું. તેને અનુંબદ્ધ તા- ૨૦ થી ૩૦ સુધી નિયમિત પ્રભાતફેરીનું પણ સુંદર આયોજન કરવામાં આવ્યું હતું. બાળકો તેમજ શિક્ષકોએ તેમાં ઉત્સાહપૂર્વક ભાગ લીધેલ હતો.

પ્રજાસત્તાક દિનની ભવ્ય ઉજવણી ૨૦૧૨

             ૨૬ જાન્યુઆરી ૧૯પ૦ ભારતના ઇતિહાસમાં એક અત્યંત મહત્ત્વપૂર્ણ દિવસ છે કારણ કે આ દિવસે ભારતનું બંધારણ અમલમાં આવ્યું અને ભારત ખરા અર્થમાં એક 'પ્રજાસત્તાક રાષ્ટ્ર’ બન્યું. ૨૬મી જાન્યુઆરીએ ભારત એક પૂર્ણ ગણતંત્ર સંચાલિત દેશ બન્યો અને આખરે મહાત્મા ગાંધી તથા દેશની આઝાદી માટે પોતાના પ્રાણોની આહુતિ આપનાર અનેક સ્વાતંત્ર્ય વીરોનું સ્વપ્ન ફળ્યું.
             તેથી જ ૨૬મી જાન્યુઆરીને રાષ્ટ્રીય તહેવાર ઘોષિત કરવામાં આવ્યો અને ત્યારથી આ દિવસ ભારતના 'પ્રજાસત્તાક દિવસ’ તરીકે માનભેર ઉજવાય છે. આ મહત્ત્વના દિને બહાદુર બાળકોને દિલ્હીના વડાપ્રધાન 'રાષ્ટ્રીય વીરતા પુરસ્કાર’થી સન્માનિત કરે છે. આ વીર બહાદુરોને માનભેર હાથી પર બેસાડી રાજપથ માર્ગ પર ફેરવવામાં આવે છે. ઉપરાંત આજના દિને બહાદુર બાળકો સંજય અને ગીતાના નામે પણ બે વીરતા પુરસ્કાર અપાય છે.

              આ અવસરનું મહત્વ દર્શાવવા દર વર્ષે એક ભવ્ય સાંસ્કૃતિક કાર્યક્રમ અમારી શાળામાં રાખવામાં આવે છે. આ વખતે મુખ્ય મહેમાન તરીકે શાળાને જમીન દાન આપનાર શ્રી સોમાકાકાને આમંત્રણ આપવામાં આવ્યું હતું. તથા ગામમાંથી નવા ચૂંટાયેલા સરપંચ સાહેબ શ્રી, તથા અમારી શાળાના અધ્યક્ષ તથા ગામમાં નવા ચૂંટાયેલા ડેપ્યુટી સરપંચ શ્રી તથા અન્ય મહાનુભાવો મોટી સંખ્યામાં હાજર રહ્યા હતાં.

            પ્રસંગને અનુરૂપ પ્રાર્થના,  આવેલ મહેમાનોનું સ્વાગત તથા કેટલાક જનજાગૃત્તિ નાટકો, વક્તવ્યો, અભિનય ગીતો રાખવામાં આવ્યા હતાં. શાળાનું ચોગાન તથા શાળા તૂટેલ હોવા છતાં ગામલોકોમાં કે બાળકોમાં ઉત્સાહ મતો ન હતો. વગર સ્ટેજ અને ચોગાને અમે દેશ માટે કઈંક કરવા ગામલોકોને કાઈક બતાવવા આતુર હતાં.

આ કાર્યક્રમમાં સ્કાઉટના બાળકો દ્વારા ધ્વજ સલામી કાર્યક્રમ તથા અંગ કસરતો અને એક ફિલ્મી ગીત કરવામાં આવ્યું હતું. નાના બાળકો દ્વારા અભિનય ગીતો વાર્તાઓ કરવામાં આવી હતી. આ વર્ષે શાળામાં સૌથી વધુ  વખત ગુલાબ બનનાર દરેક વર્ગના પસંદ કરેલ બાળકની માતાને ખાસ બોલાવી તેમનું સન્માન કરવામાં આવ્યું હતું.

            કાર્યક્રમનું સંચાલન શ્રીમતી રીનાબેન જે. શાહે કર્યું હતું. તથા ધ્વજવંદન વિધિ શ્રી નિલેશભાઈ એ  કરી હતી. ખાસ વક્તવ્યમાં શાળાના પ્રથમ આ. શી. શ્રી રામસિંહ સાહેબે કર્યું હતું.

બાળકો આજે ખુબ ખુશ હતાં.દેશ માટે કૈક કરવાની તથા એક સારા નાગરિક બનવાની તેમની ભાવના સ્પષ્ટ દેખાઈ આવતી હતી.

પ્રજાસત્તાક દિન નિમિત્તે ખાસ કવિતા શ્રી ગોવિંદકાકા લિખિત..

ત્રિરંગો ફરક્યો..ફરક્યો….કાવ્ય

ત્રિરંગો ફરક્યો…ફરક્યો….કાવ્ય

=================================================

આપણારાષ્ટ્રીય શાયર ઝવેરચંદ મેઘાણીજીની અનમોલ રચના 

                              “ચારણ કન્યા”

અને આદરણીય વડીલ શ્રી રમેશભાઈ પટેલ (આકાશદીપ)

દ્વારા રચાયેલ “મેઘા” પરથી પ્રેરણા લઈને આપણા આન બાન

ને શાન સમા ગૌરવ પૂર્ણ પ્રતિક  સમા રાષ્ટ્ર ધ્વજ માટે …….. 

================================================

              ચિત્ર માટે ગુગલનો આભાર.

-=====================================================

હરખતા હિન્દુસ્તાનના હૈયે ફરક્યો 

પરાધીનતા કેરી  પાંખે જ   ફરક્યો  

આઝાદીની સોનેરી ઉષાએ ફરક્યો

અડધી રાતે લાલ કિલ્લે જ ફરક્યો

આન બાન શાનથી હરદમ ફરક્યો

જન જન માનવ કેરા  હૈયે ફરક્યો

ઉંચા આભમાં પણ  ગર્વથી ફરક્યો

ઘૂઘવતા સાગરમાં હિલોળે ફરક્યો

હિમાલયના એવરેસ્ટ શિખરે ફરક્યો

ચંદ્ર કેરી શીતલ ચાંદનીમાં ફરક્યો

કાશ્મીરથી કન્યાકુમારી સુધી ફરક્યો

ગોવાથી ગૌહાટી સુધી હરદમ ફરક્યો

આઝાદીના દીવાનાના દિલમાં ફરક્યો
શહીદો કેરી શહાદતના માનમાં ફરક્યો

હવાઈ દળના વિમાન પાંખે ફરક્યો

નૌકાદળ કેરા વહાણે પણ ફરક્યો

લશ્કરી દળના મથકે પણ ફરક્યો

હર જવાનના કાંધે મલકીને ફરક્યો

વાઘા બોર્ડરની સરહદે શાનથી ફરક્યો

કાશ્મીર કેરી વાદીઓમાં  પણ ફરક્યો

કચ્છ ને રાજસ્થાનની સરહદે ફરક્યો

બાસઠના યુધ્ધે ચીન સરહદે ફરક્યો

પાંસઠ ઈકોતેર ને કારગીલ યુધ્ધે ફરક્યો

અબાલ વૃદ્ધની આશા અરમાને ફરક્યો

સંસદ કેરા ભવને હરદમ ફરક્યો

રાષ્ટ્રપતિ ભવને દિનરાત ફરક્યો

રાજ્યોની રાજધાનીએ  જ ફરક્યો

વિધાનસભા કેરા ભવને પણ ફરક્યો

હાઇકોર્ટ સુપ્રીમ કોર્ટના શિખરે ફરક્યો

માનવંતા ન્યાયાધીશના મેજ પર ફરક્યો

શાળા મહાશાળા ને વિદ્યાલયે ફરક્યો

બાળકોને શિક્ષકોના હાથે પણ ફરક્યો

વડીલો ને  સરપંચ કેરા હાથે ફરક્યો

સ્વાતંત્ર્ય સેનાની કેરા  હરખે ફરક્યો  

ઝાડે ઝાડે  ડાળે ને પાને પાને ફરક્યો

મહેલાતો ને ઝુંપડી દ્વારે પણ ફરક્યો

નગર નગર ને જંગલ જંગલ ફરક્યો

ગામે ગામ ને હર શેરીએ જ ફરક્યો

સાત સમન્દર પાર કરીને પણ  ફરક્યો

દેશ વિદેશમાં રાજદૂત મહાલયે ફરક્યો

પરદેશી મહેમાનોના સ્વાગતે જ ફરક્યો

મંત્રણા કેરા ટેબલ પર પણ ફરક્યો

સહિયારા નિવેદનના ટાણે  ફરક્યો

કોલ કરારના સુંદર અભિગમે ફરક્યો

પોસ્ટ ખાતાની ટપાલ ટિકિટે ફરક્યો

રાષ્ટ્ર સંઘના મુખ્યાલયે  શાનથી ફરક્યો   

સજ્જન કેરા સહારે પણ  હું ફરક્યો

દુર્જનો કેરા  દ્વારે પણ હું ફરક્યો

રમતના મેદાનોમાં સતત ફરક્યો

ક્રિકેટ ને હોકીની રમતોમાં ફરક્યો

ઓલમ્પિક ને રાષ્ટ્ર ખેલમાં ફરક્યો

સચિન કેરા શતકોએ પણ ફરક્યો

ચોગ્ગા ને  છક્કાના રણકારે ફરક્યો

કપિલ કેરી કમાલે ત્યાસીમાં ફરક્યો

ઘોનીના ધમકારે વર્લ્ડ કપમાં ફરક્યો

કલામ,ભાભા, સારાભાઇ શોધમાં ફરક્યો

નફફટ નેતાઓના હાથે  પણ ફરક્યો

ભ્રષ્ટાચારી અમલદારોના હાથે ફરક્યો

આઝાદ દિને  લશ્કરની પરેડમાં ફરક્યો  

પ્રજાસત્તાક દિને લશ્કર પરેડે ફરક્યો

હર હિંદુસ્તાનીના તન મન ઘરમાં ફરક્યો

દુશ્મનોના છક્કા છોડાવી વટથી ફરક્યો

કવિ લેખકો સાહિત્યકારોની કલમે ફરક્યો

ફરકવાનું મારું અહોભાગ્ય કે હરદમ ફરક્યો

  પણ !!!!!!!!!!!!!!!!!!!!!!!!!!!!!!!!!????

================================================

સ્વપ્ન જેસરવાકર (ગોવિંદ પટેલ)

 Thank You,

Govind Patel

 Swapnajesarvakar

પ્રજાસત્તાક દિનની ખાસ ભેટ

                આ વર્ષે પ્રજાસત્તાક દિન નિમિત્તે ખાસ અમેરિકાથી શ્રી ગોવિંદકાકા (જેસરવાવાળા)  તરફથી શાળામાં નાની સાઈજના ૧૨ ધ્વજ, મીડીયમ સાઈજનો ૧ ધ્વજ તથા ફૂલ સાઈજનો ૧ ધ્વજ, ગાડી પર લગાવવાનો ૧ ધ્વજ, તથા બીજી પણ કેટલીક ભેટો શાળા પરિવારને ભેટ આપવામાં આવી હતી.
                 નવાઈની વાત તો એ હતી કે આ બધા ધ્વજ ખાસ તેમને અમેરિકાથી (Made In Chinaના) ઓર્ડર આપી બનાવ્યા હતાં. અને અમેરિકાથી સાથે લઈને જ આવ્યા હતાં. તેઓ આજે સવારે ૭ વાગ્યે ઘરે આવ્યા અને આવતાની સાથે જ તેમને પ્રથમ કામ અમને અમારી ભેટ આપવાનું કર્યું. શ્રી ગોવિંદકાકાએ પેટલાદ તથા જીલ્લાની કેટલીય શાળાઓને ધ્વજ તથા બાળઉપયોગી કિટ્સ ભેટ આપી છે. તેઓ ભૂતકાળમાં એક શિક્ષક જ હતાં અને આજે પણ શિક્ષકનો જ જીવ છે. તેમને શાળાને જોઈતી મદદ કરવાની તૈયારી બતાવી હતી.
                 શાળા પરિવારના શિક્ષકો, વાલીઓ તથા બાળકો તરફથી શ્રી ગોવિંદકાકાનો ખુબ ખુબ આભાર.

વકૃત્વ સ્પર્ધા અને નિબંધ સ્પર્ધા

                  આજરોજ સદભાવના કાર્યક્રમ અંતર્ગત અમારી શાળામાં નિબંધસ્પર્ધા તેમજ વકૃત્વસ્પર્ધાનુ આયોજન કરવામાં આવ્યું હતું. વકૃત્વ સ્પર્ધાનો વિષય હતો : “વિકાસનો દસકો ” જયારે નિબંધસ્પર્ધાનો મુખ્ય મુદ્દો હતો : “ભ્રષ્ટાચાર ” જેમાં ધો- ૫ થી ૭ ના વિધાર્થીઓએ ભાગ લીધેલ હતો. તેઓએ પૂરા ખંતથી આપેલ મુદ્દાઓની છણાવટ કરી હતી. આમ સ્પર્ધા બાદ વિદ્યાર્થીઓ પોતાના શૈક્ષણિક કાર્ય માટે વર્ગ ખંડમાં ગયા.